Balansen
Banken sin forretningskapital, definert som summen av banken sin forvaltningskapital og utlån som er plassert i Eika Boligkreditt, utgjorde kr. 5,4 milliardar pr. 31.12.2025, mot 4,8 milliardar i 2024. Dette tilseier ein auke på 10,9 %.
Banken sin forvaltningskapital auka med kr. 285 millionar, som tilseier ein årsvekst på 6,7 % til kr. 4,0 milliardar pr. 31.12.2025. Tilsvarande var det i 2024 ein auke på kr. 156 millionar som tilsvarar 3,8 %.
Utlån
10,3 % (5,2 %)
Dei samla utlåna har auka med 10,3 % siste 12 mnd.
Kr. 4,750 mrd
Banken sine samla utlån passerte kr. 4,750 mrd, 31.12.2025
Banken sine totale utlån i eigen balanse auka med kr. 171 millionar, tilsvarande 5,3 % til kr. 3,4 milliardar pr. 31.12.2025. Tilsvarande var det ein auke i 2024 på kr. 103 millionar og 3,2 % målt mot føregåande år. I sum har banken ved utgangen av 2025 lån for totalt kr. 1.340 millionar plassert i Eika Boligkreditt.
Om ein inkluderer Eika Boligkreditt har dei totale utlåna auka med kr. 445,9 millionar tilsvarande 10,3 %. Førre år var veksten på 212 millionar tilsvarande 5,2 %.
Brutto utlån til landbruket utgjorde kr. 136,6 millionar mot kr. 143,4 millionar ved utgangen av 2025. Banken har dei siste åra hatt ei strategisk satsing på å vinne kundar som driv moderne og effektivt landbruk.
Sum garantiansvar er på kr. 15,4 millionar mot kr. 12,9 millionar i fjor. Garantiansvaret gjeld i hovudsak kontraktsgarantiar som er stilt for kundar i høve deira kontraktsplikter.
Styret registrerer at utlånsveksten for 2025 vart som venta, og i tråd med banken sin strategiplan om å ha lønsam, berekraftig og robust vekst. Veksten finn for det aller meste stad i banken sin geografiske hovudmarknad. Styret er også nøgd med at banken har auka marknadsandelen trass i sterk konkurranse om kundane.
Innskot
Banken har finansiert ein stor del av utlåna på eigen balanse gjennom innskot.
Banken sine totale innskot frå kundar auka i 2025 med kr. 165,4 millionar. Førre år vaks innskota med kr. 132 millionar. Auken frå 2024 til 2025 utgjer ein vekst tilsvarande 5,9 %. Tilhøyrande vekst var på 5,0 % i 2024. Innskotsdekninga vert målt som totale innskot i prosent av totale utlån og er 86,18 % pr. 31.12.2025 mot 85,64 % i fjor.
Verdipapir
Ved årsskiftet hadde banken sertifikat, obligasjonar og andre renteberande verdipapir til ein samla verdi av kr. 313 millionar mot kr. 308 millionar førre år. Ved utgangen av 2025 hadde banken kr. 154,8 millionar i anleggsaksjar og omløpsaksjar, mot kr. 125,1 millionar ved inngangen av året. Av dette beløpet var kr 147,3 millionar klassifisert som anleggsaksjar, kr. 7,5 millionar i omløpsaksjar og eigenkapitalbevis.